أنشودة { مصر مُصَدِّرَة الحضاره للعالم } للدكتور/خالد عبدالحميد خربوش
أنشودة { مصر مُصَدِّرَة الحضاره للعالم }
للدكتور/خالد عبدالحميد خربوش
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
إسمع وسيم باشا السيسي
العَالِم المصري النافع
كلامه حَرَّك أحاسيسي
لأنه عن مصر...مُدَافِع
أذاع كلام حلو بـ يِفْرِح
بـ يرَيَّح النَفْس...ويِشْرِح
٠••••••••••••••••••••••••••••••••••••••••
في الهايد بارك المشهوره
وقف إنجليزي بـ يتباهى
قال..إحنا نور المعموره
وعِلْمِنَا الفَذّ بناها
ع البرلمان قالها..مناوله
كانوا هُمَّا لُه أَوِّل دوله
٠••••••••••••••••••••••••••••••••••••••••
قاطعه بـ هدوء النيجيري
وقال له إسمع لو تسمح
جُمَلِي وكلامي وتعبيري
فيها الحقايق بس إلمح
وبفطنه وكياسة عُلَمَا
أزاح بها ستار الضَلْمًه
٠••••••••••••••••••••••••••••••••••••••••
قال له الحضاره الرومانيه
في بلدكوا كان ليها رياده
ناقلاها دي م اليونانيه
والأصل من مصر ياساده
أبهر جميعهم بـ لباقه
مَ هُوُ مصر أَلْفَه وسبَّاقه
٠•••••••••••••••••••••••••••••••••••••••••
قال( أفلاطون )جاها مِسَلِّم
بـ نَفْس في التعليم طامعه
دستة سنين وسَنَه...اتعَلِّم
الفلسفه في مصر الجامعه
طِبّ وفلك وعلوم أُخْرَى
بـ مصر طايره...ومُتَفَاخْرَه
٠•••••••••••••••••••••••••••••••••••••••••••
أبو الفلاسفة( طاليس ) جالها
على نَفْس منهج أسلافُه
سَبَع سنين عاش في مجالها
وفبها حقق أهدافُه
على أرض مصر..وعاش دارس
أصبح لـ عِلْمُه هُوَ الفارس
٠••••••••••••••••••••••••••••••••••••••••••
إتنين وعشرين سَنَه تامَّه
( فيثاغورس )في مصر بـ يِدْرِس
عِلْم الرياضيات لَمَّا
بقى فيها مَرْجِع...بـ الفِهْرِس
زكَّاها في الكُتُبِ المَوْلَى
من عَهْد ما اتوجدت دَولَه
٠••••••••••••••••••••••••••••••••••••••••••
( وصولون )في مصر قَعَد أسهب
يِدْرِس قانون فيها.....ماتبخل
للمكتبه اعتنق المذهب
إسمه الآموني..عشان يدخل
الغربي سأله....ياصديقي
من مصر؟..قال:لأ....أفريقي
٠••••••••••••••••••••••••••••••••••••••••
وقال مادُمنا فـ أفريقيا
فـ مصر تاجها...وأمجادها
أنا بـ افتخر بيها الراقيه
وشرف لأفريقيا وجودها
العربي قال:مصر حضاره
الغربي...صفق بـ حراره
٠••••••••••••••••••••••••••••••••••••••••••••
ياوسيم ياسيسي..تحياتي
ياوطني بـ يقَدِّس بَلَدُه
بـ ترُد مصر...لك الآتي
وطنك بـ يعتز بـ وَلَدُه
عَالِم كبير قامه وقيمه
بـ ولادنا يامصر عظيمه
………………………………………………………
للدكتور/خالد عبدالحميد خربوش
تعليقات
إرسال تعليق