مش من حقك... من ديوان/ على الربابة للشاعر / مصطفى فريد
مش من حقك...
من ديوان/ على الربابة
للشاعر / مصطفى فريد
...................
مش من حقك تاخدى قرارك انتى لوحدك
أو تنسينى وتلغى وجودى وتمشى بعقلك
ليا حقوقى وعهود بينا واسألى قلبك
هو يا روحى لوحده يقول لك
مش من حقك
تاخدى قرارك انتى لوحدك
أول خطوه معاكى فاكرها ورعشة كفك
وانتى بتحكى بدمع عنيكى حكاية حبك
قولتى بحبك حب ما شفته ابدا قبلك
حب يكفى الدنيا بحالها وملايين بعدك
وإسألى قلبك
هو يا روحى لوحده يقول لك
مش من حقك
تاخدى قرارك انتى لوحدك
قولتى عاهدنى فردت إيديه وقلت أعاهدك
قولتى اوعدنى بطيبة قلبى لقيتنى بواعدك
كان الحب الساكن فيا رهن اشارتك
بس ساعتها كان بإرادتى مش بإرادتك
واسألى قلبك
هو ياروحى لوحده يقول لك
مش من حقك
تاخدى قرارك انتى لوحدك
بعد دا كله وبعد الدنيا ماعرفت حبك
جايه تقولى إن قرارك ملكك وحدك
لأ. مش حقك ولا من حقك دقة قلبك
قلبك دق وحب الدنيا لما قابلتك
واسألى قلبك
هو ياروحى لوحده يقول لك
مش من حقك
تاخدى قرارك انتى لوحدك
تعليقات
إرسال تعليق