إرجعى... من ديوان/ سيبنى أحلم للشاعر / مصطفى فريد
إرجعى...
من ديوان/ سيبنى أحلم
للشاعر / مصطفى فريد
.................
الكل جالك قال سلامتك
إلاّ أنا
الكل اتمتع بصورتك
رغم مرضك
إلاّ أنا
مش بخل ولا بعد المسافة
ياحبيبتى إنما
خايف عليكى تشوفى دمعى
يألمك فيا الضنا
تتصورى
أنا إللى مالك زمام الحرف
وبحور الكلام
مش قادر أكتب كلمتين
هربانه فى عنيه السطور
متحيرين
متشتتين
بين التمنى والدموع
ضاعت معانى الحرف
وانطفت الشموع
نسيت خلاص كل الكلام
كل الحروف
كل الصور
تاهت بحور الكلمه
فى محيط الألم
مابقتش فاكر منها
غير كلمة بحبك
ودعوة بتقول إرجعى
إرجعى لى زى ما انتى
زى أول مره شفتك
بابتسامتك
وبحنانك
وبغرامك
إرجعى لى بأى لون
لاجل ما أقولك سلامتك
تعليقات
إرسال تعليق