قصيدة عيد الحب أهديها إلى حبيبتي
أقصد إلى زوجتي
هذه القصيدة كتبتها لزوجتي رحمة الله عليها بمناسبة عيد الحب من حوالي ثماني سنوات .. أي في حياتها .. وكانت سعيدة جدا بهذه القصيدة.
ملحوظة : بعد ثلاث أيام أي يوم 17 فبراير سيكون مضى على وفاة زوجتي 5 .. خمس سنوات
قصيدة عيد الحب
أنا أول مره شفتها كان صدفة وبصراحة قلبي إتخطف
كان صدفة هذا اليوم من أحلى وأجمل الصدف
من يومها وقلبي دق وعرفت إن مساره إختلف
صحيح حبيتها وإرتحتلها وكانت سعادتي ما تتوصف
أنا بعترف إنها غيرت أحوالي وكل شيئ فيا إختلف
هقول إيه ..
وألا إيه ..
وألا إيه ..
هقول عن أشواقي
ولا هقول عن تفكيري فيها وسهري الليالي
ولا هقول عن أحلامي وأمنياتي
ولا هقول عن سعادتي وأفراحي
أما كلمتني مسمعتش كلام ..
أنا مش عارف سمعت إيه
سمعت غنوة
ولا مقطوعة موسيقية
ولا سمعت أجمل سيمفونية
كلامها عبر عن رقتها وخفة دمها
خلاني كأني بحلم وأنا معاها وجنبها
قولت في نفسي .. إيه إللي جرا ليا
يا ترى ده من رقة صوتها
وألا من سحر عينيها
شعرها كان نازل على خدودها
إل ذاد من جمالها وسحرها
أما عنيها فجمالها وبريقها الهادئ يشهد لها
هقول عن طيبتها ولا عن قوة شخصيتها
ولا هقول عن أدبها وأخلاقها وثقتها بنفسها
ولا أقول على سعادتي يوم ما خطبتها
عشان كده بقول .. إيه فايدة وجودي في الدنيا من غير ما أكون جنبها
حبيبتي أما بشوفها بشوف ملكة جمال الدنيا أمامي
وأما لمست إديها أول مرة إزدادت فرحتي وإهتز كل كياني
وأما أخدتها في أحضاني .. نسيت كل همومي وأحزاني
دا أنا عرفت كلام الحب وفنون الغزل من سحر عينيها
ودُقت طعم الحب من قبلات خدودها وشفايفها
وشعرت بالدفئ .. أما بحضنها
راحت أيام وشهور وسنين
وحبي لها بيزداد أشواق وحنين
بيقولوا إن اليوم هو يوم عيد الحب
طيب ما كل يوم بيمر علينا وإحنا في حب وأحلى حب
حبيبتي .. إذا كان اليوم عيد
فكل سنه وأنتٍ طيبة
كل سنة وأنتِ نبض قلبي
كل سنة وإنتٍ منورة حياتي
كل سنة وإنتٍِ الحب والحب إنتي
كل عيد حب وإنتٍ في قلبي وعقلي ووجداني
التوقيع
بحبك .. بحبك .. بحبك
♥ ♥ ♥ ♥ ♥ ♥ ♥ ♥ ♥ ♥
على فكره كل كلمه كتبتها .. كتبتها لزوجتي اللي بحبها
اللي ورا بتقول إيه
علي صوتك شويه .. إيه
إنت بتحبها ليه .. ؟
أقولك أنا بحبها ليه .. !!
أنا بحبها علشان وفاءها وإخلاصها وصدقها
بحب إتزانها وقراراتها اللي طالعة من عقلها
بحب إقصادها وتدبيرها في بيتها وخوفها على وعلى بنتها
بحب إهمامها بييا وإهتمامها بنفسها
بحب رشاقتها وبحبها لما تٍخنت وزاد وزنها
بحب شعرها الأسود اللي تسلل ليه البياض واللي زاد من جمالها وسحرها
بحب كبر سنها وبحب تجاعيد وشها
بحب حديثها وخفة دمها
بحب العشرة الطويلة اللي جمعة بين قلبي وقلبها
عرفت أنا بحبها ليه
ولا أقول وأزيد في محاسنها كمان
أتمنى لكل أصدقائي أن يحبوا زوجاتهم مثل حبي لزوجتي
رحم الله زوجتي وجعل مثواها الجنة في الفردوس الاعلى مع الصديقين والشهداء وحسن أولئك رفيقا
التوقيع / زوج حزين
تعليقات
إرسال تعليق