((((اللمة والعمة))))! ....بقلم أبو حمزة رشوان

((((اللمة والعمة))))!
غلطان أنا فى حقك ياعمة..
ومقصر مع كل الحبايب..
وحشاني القعدة واللمة ..
والله أنا فى حقك عايب..
خدتني الدنيا والأحوال..
كام مرة اقولك جاى..
قصرت حتى فى السؤال..
نفسى اشرب معاكى الشاى..
فاكرة يوم مكونا عيال..
ونخطف منك الطرحة..
وتدعى لينا نكبر ونبقى ارجال.
سرقتنا الدنيا ياعمةوسرقت منينا الفرحة.
فين القى اللمة ياعمة....
كل واحد راح فى مكان..
أتغير الزمن ياعمة...
ومعدش ليها أمان...
القرش فيها كان يفرح..
نسعد بحبة كرملة من الدكان..
والكبير ليه كلمة ويصلح..
وفيه محنا على الغلبان..
بقيت ياعمة ماسخه وتقيلة..
وفرقت ما بين الأخوات...
اتشدى. فيها بالتيلة...
وممبطلاش طلبات..
والقادر يدوس على الضعيف..
اتنزعت الرحمة من القلوب..
أعرف ناس ياعمة مش لقية الرغيف.
وجارها بالحيط محتكر الحبوب....
مش بقلك ياعمة بقية بخيلة..
الناس مش طايقة الهدوم...
تحسى المحبة داخيلة..
منزوع منها الدسوم...
زودت أنا همك هم..
مش هى دى القعدة القديمة..
أحوال بقية تفور الدم..
والاخلاق بقية عديمة..
شباب لابيحترم خال ولا عم.
ولاحتى عامل للأب قيمة..
حبوب وشم وغم وهم مايتلم
ماتت وراحت الناس الحكيمة..
لا بقى تعليم ولا بقى صحة..
الطب بقى شغال تجارة..
إللى عنده مغص ذى اللى عنده كحة.
يكتبلك روشتة تعبى العلاج فى شكارة..
ومدارس مفهاش تعليم..
الا الدروس الخصوصية..
حمار وتختة وكوم برسيم..
ومدرس وخدها وسية..
وبنات بتلبس على الموضة..
خارجة وخريطة مرسومة..
وكوم عيال عايشين في اوضة.
نفسية بقية مهزومة...
والله ياعمة بقية فوضة.
والفقر بورقة مختومة..
وانسينا الدين و يا الدنيا..
واشربنا الجهل فى تطعيم..
تركنا الكتاب فتهنا..
فريسة سهلة لصياد لئيم..
راحت الايام ياعمة..
بقى الصغير يضرب الشايب..
كنا نقعد كلنا لمة...
ونفطر من ايد الحبايب..
ناكل من قلب الماجور..
لبن بالوش والرايب..
ندمس الكانون ونولع البابور..
وكلنا كنا قرايب..
طبلية تجمع الجيران..
ولافينا واحد غايب..
نضحك ونهزر وللقعدة سلطان..
ونختار من بينا واحد خايب..
وتدور الدايرة بالمظبوط.
كل يوم على واحد..
حبل المحبة بينا مربوط ّ..
ولا فينا واحد لاخوه جاحد..
اتغيرت الايام والنفوس..
حتى الحب بقى مجمد..
شفتى الواد المفعوص..
اللى اسمة محمد...
كبر ياعمة دلوك وبيقول باى..
وفكك منى وكبر الدماغ .
المرة الجاية هجيبو معاى..
ان كان عنده فى وقته فراغ..
مش بقولك ياعمة الزمن اتغير..
لسة خارج من اللفة وبقى مشغول..
أجيال ياعمة بقية تيحير..
ويطير. معها العقول..
فين كلامك ياعمة الز طعامك لجندك.
شكلك ياعمة بقية بخيلة..
أنا اليوم معزوم عندك..
قومى حضرى الغداء يااصيلة..
.................
....((((اللمة والعمة))))
بقلم أبو حمزة رشوان