فقت على حلمة تفزع أفادي
مانعست ما كملت رقادي
في الحلمة والليلة مظلمة
سمعت واقيف قال حكمة
الواقيف عطاني قلم وسيف
ركبني عود وبالما رش وسادي
قال كلمة فيها مرادي
بدل العتبة توكل على الهادي
قدامي تسرحو طرقان ومراير
فين الشر فين الخير
وش نقبض هذي ولا هذي
على كتافي تحرفت سيف حافي
علقت حروز جدادي تزودت بزادي
أول مريرة بدات بسكومة مهمومة
تحكي همها وغمها على دومة
ومريرة بدات بكلخة مكلومة
تشكي لعطش على سدرة مضيومة
ومريرة بدات بخيمة مهدومة
تهرس حمارها لمسوس باللومة
لومة العيشة الحارة زكومة
قلت نشوف الفال أشنو قال
لاحني عود من لعواد
في مسرب مجنب هواد
ما عرفتو فين يكركب فين صاد
أش داني وانا غريب وحداني
علاش نتغرب في هاذ لمسرب
أراسي مالك قاصي عاصي
فين غادي وأنت فرادي
قلبي بالسم والهم مجروح
وكنازتي المسيوكة بالروح
شكيت المسرب المبحوح
قبل الفروج قبل المشبوح
دوزني الوقت على غابة مجرابة
مسيلة دم بشواقر الحطابة
عكلني عظم عليه أثر الدم
فخد غزالة مدفون في ردم
شفت كريكر تكركر وتحوم
تويل على ولدها واحل
في فم لفعة تزغرت بالسم
بسيفي لحافي قطعت راس الهم
حميت الفرخ من الظلم
في الغابة نايضة قرابة
الصغار فريسة لكبار
بنهار كهار ولا من ثار
الغابة ولات خلا وقيفار
حتى الذيب حكار بالظلم والعار
فين لعشاش فين الخفاش
فين غلة لشجار
فين النحلة تزنزن فوق النوار
مال الزمان غدار
نغزت بناب الركاب
عودي لحنحان السرحان
طلق السيقان زعفان
قطع شعاب وويدان
من واد النيل
وردت عودي لخليل
سرحت عيني على حد الشوف
حلفت بالحلوف
نكتب تاريخ جديد بالحروف
بالتاريخ لمحذوف
تخرج روح الحكرة من الغرضوف
نفرزو لحم لخروف من شحم الحلوف
محمد المؤذن مؤسس ورئيس جمعية كازابلانكا
للتراث الشعبي والتنمية والتربية على المواطنة
تعليقات
إرسال تعليق