الرسالة السنوية رقم ١٨ إلى روح امى رحمها الله
الرسالة السنوية رقم ١٨ إلى روح امى
رحمها الله
جاتنى صورتك فى منامى
خففت شوقى وآلامى
بعترت ضيك فى قلبى
نورت عمرى وضلامى
وقتها تهته لسانى
وارتجف م الشوق كيانى
لا قدرت امسك نهر دمعى
ولا حتى افسر لك كلامى
لسه فاكر ياحته منى
عشت طول عمرك تغنى
أتعب انتى تشيلى عنى
أزعلك وكمان تحنى
والإيدين كانت تطبطب
ألقى حر القلب رطب
كل دا ياغالية شطب
يوم غيابك يا امه عنى
كنت أنام تسهر عنيكى
وأما اخاف قلبى يناديكى
كل هم الدنيا يرحل
ويا لمسة من ايديكى
سيبتى جمر الدمع سايل
بيه كتبت أغلى الرسايل
الحروف صبحت بدايل
اواسى بيها القلب فيكى
من يوميها تهت منى
بعد منك دمعى خانى
سال على الخد وسألنى
مين على الايام يعنى
راحت النسمه الجميله
راحت الغاليه الأصيله
كان تعبها كل ليله
لأجل تنام تسهر تغنى
والختام بحروف رسالتى
عاجز اوصف ليك حالتى
بعد ما عنى رحلتى
حزنى قتل في ابتسامتى
الفراق واجع فى قلبى
ليل ونهار مش قادر أخبى
الدموع طلقات فى صدرى
كسرت مقداف سفينتى
ربى يفرش لك فى قبرك
نور وضى بقدر صبرك
تحت قدمك يبقى حنه
توصف الجنه فى ردك
لأجل مايدق الوريد
يوم وصول الرد عيد
اتهجى اسمك من جديد
والحزن يتبدل فى صدرك
تعليقات
إرسال تعليق