زمن الديابة من ديوان / ولسه بحلم بفجر للشاعر / مصطفى فريد
زمن الديابة
من ديوان / ولسه بحلم بفجر
للشاعر / مصطفى فريد
برغم المسافة وطول البعاد
ورغم إختلاف اللون والعقيدة
باحس إني منك
وباشعر بأنى حزين لما أسكت
وأغمض عنيه
وأدفن دماغى فى قلب الرماد
وشايفك يا صاحبي بتنباع رخيص
فى سوق العبيد
نخاسك أخوك
بيتاجر فى همك وقوت الولاد
ويشرب فى دمك ولحمك مزاد
مباح للى يدفع فى لحم الأسير
جنيه أو دولار
وأرضك عمار
ولسه أنت داير تمد الإيدين
وخيرك لغيرك.
وعرق الجبين
بيصرخ بشدة وينده عليك
مادمت أنت عايش فى عصر الديابه
تذأب ياصاحبى
وفوق من منامك
قوم اركب حصانك
دوس فوق خصامك
عض بسنانك كل خلافاتك
وغير مكانك ما بين الجيران
ماعدش فى زماننا
مكان للصغار
زماننا ياصاحبى
زمان المصالح وعصر الكبار
تعليقات
إرسال تعليق