حلــــــــــــــــم ———————شعر/ محمد توفيق مصر-بورسعيد
حلــــــــــــــــم
———————
بحلم ببكره أكون معاك
بحلم بيوم نقضيه هناك
نلعب سْوا
نضحك سْوا
ويبتدى عمرى بلقاك
ونفتكر
إن أحنا جمعنا الهوا
ومكنش فيه بينا ميعاد
وحبنا فاق البشر
عدا الصعاب
عدا الخطر
بحلم بيوم بْوسنا القمر
ومسكنا نجمة
كانت صديقتى فى السهر
بحلم
وبحلم
والقى صوتك بينادينى
إصحى بقى
فووووووق
ده حلم
----------------------.
احلى أيامى معاكى
حلم ليه ؟!
إنتى مش حاسة بشعورى
ولا ايه ؟!
حولى الحلم لحقيقة
خلى أحلامنا جريئة
أبسط حقوقى معاكى
أعيش لحبك
بالثوانى والدقيقه
وأنسا كل حاجه فيه
وافتكر إن إنتى ليِّ
مهما عاندنى الزمان
ومهما كان حكمه عليِّ
مش هسيبك
وانتى عارفة إنى نصيبك
والقى صوتك بينادينى
أصحى بقى
فْوووووووق
ده حلم
------------------.
قلبى كان عمره عليل
وإنتى الطبيب
إنتى الدوا
عشت أحلم بلقاكى
وأبتدى معاكى حياتى
وأقضى عمرى فى هواكى
وانا ليه مين سواكى
نور بيهدينى لطريقى
والقى حلمى شىء حقيقى
وفجأءة القى صوت ينادى
أصحى بقى
فوووووووووق
ده حلم
---------------------.
لو أعترفنا بالحقيقة
نلقى كل حياتنا حلم
حبنا من غير أوان
يبقى حلم
ندخل الجنة بأمان
برضه حلم
المس النجوم معاكى
أيوه حلم
أملك الدنيا بلُقاكى
والله حلم
تجيينى فى الأحلام ملاك
فى أحلى حلم
نلقى حياتنا الجميلة
حلم لسنينا الطويلة
طب سْيبينى
أحول الحلم لحقيقة
ومش ضرورى تفوقينى
وتقوليلى بصوت ملايكى
أصحى بقى
فووووووووق
ده حلم
————–.
شعر/ محمد توفيق
مصر-بورسعيد
تعليقات
إرسال تعليق