عم بيرم .... إعرفوه. قصيدة { رحلة أديب جسور } ٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠الدكتور/خالد عبدالحميد خربوش

عم بيرم .... إعرفوه.

قصيدة { رحلة أديب جسور }

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عم بيرم في الزمن ده محتاجينه

أو أقله نعرفه ونعيش سنينه

العمالقه في الأدب كان مختارينه

للزجل يبقى الملك كل العصور

٠•••••••••••••••••••••••••••••••

قلت لازم يعرفه جيل النهارده

حتى لو راح آلاقي فيها كتير معانده

إبتديت أجمع كتير من غير مسانده

عن حياته ينكتب هنا ع السطور

٠••••••••••••••••••••••••••••••••

البدايه بتاعته كانت في جريده

من عروس البحر الابيض المجيده

إنتقد مجلسها البلدي بـ قصيده

بعدها شق الطريق وأضاؤه نور

٠••••••••••••••••••••••••••••••••••

من يوميها في الأدب حالف نجاحه

هوَّ نَفْسُه قصه تحكي عن كفاحه

خد عهود على نَفْسُه قلمه يكون سلاحه

عاش حياته صبور وكان وطني وغيور

٠•••••••••••••••••••••••••••••••••

كل أبيات شعره في الأوصاف رقيقه

فيها معنى وذوق وفن مع الحقيقه

كان مميز له في شعره ياناس طريقه

تلقى نفسك منها في غاية السرور

٠••••••••••••••••••••••••••••••••••

كان يعدِّل أي وضع يبان له مايل

وبكلام في العضم يوجد له بدايل

و-فـ بحور الشعر ويَّا الوزن هايل

مهماعنه ح اقول كتير-ح يكون قشور

٠•••••••••••••••••••••••••••••••••

الكتابه بتاعته كانت فيها قسوه

عن كتير طنابير في نظرُه ياناس ماتسوى

شاف في عبدالله النديم لحياته أُسوَه

حب فيه وطنيته وشخصه الطهور

٠•••••••••••••••••••••••••••••••••

فضل ربه عليه كتير أنشأ مجله

إسمها في الوقت ده كان (المسله)

واللي شافوا إنها ليهم مذله

قفِّلوها أصلهم ساكنين جحور

٠•••••••••••••••••••••••••••••••••

(الخازوق)إختاره إسم مجله غيرها

برضه خافوا الجرأه منها ومن سطورها

قَفْلَها كما قَبْلَها كان ده مصيرها

كل ده ومافاتش إلا يادوب شهور

٠•••••••••••••••••••••••••••••••••

الكتابه عنده ليلى وقلمُه قيس

راح بهم لـ مجله يِدِّي م النفيس

هيَّ(إكسبريس)وفيها كان حريص

إنه يِدِّي فكر عالي بدون غرور

٠••••••••••••••••••••••••••••••••••

بعدهم تحرير مجلة(الشباب)

ماارتضاشي يوم يكون مقفول له باب

ماانتقدش زميل وقال إيش جاب لـ جاب

حتى مافي كلمه طلعت منه زور

٠••••••••••••••••••••••••••••••••

راح لـ تونس موطنه وآن الأوان

إنه يكتب فيها في جريدة (الزمان)

كان بـ نَفْس الجرأه والروح والإيمان

والأداء هُوَّاه وكان نَفْس الشعور

٠••••••••••••••••••••••••••••••••••

ولمجله إسمها (الكشكول)هداه

ليها فِكْرُه وبتأني كبير معاه

إدَّى فيها دروس كتيره للحياه

ماسألش عن مقابل أو أجور

٠••••••••••••••••••••••••••••••••

إدَّى برضه كلام جميل قاسي وحنون

في مجله إسمها يومها(الفنون)

والجُمَل واضحه بدون لبس وظنون

وبأسامي ليها رمز وليها دور

٠•••••••••••••••••••••••••••••••••

فوق سطور (المطرقه) كان له حروف

المعاني فيها أقوى من السيوف

دي مجله كان بـ يعشقها الألوف

لاهتمامها بـ مجريات كل الأُمور

٠•••••••••••••••••••••••••••••••••

في مجلة (الإمام)كان له كلام

زي شهد معاه يضيع مُرّ اللئام

زي نور واضح وزاح كل الضلام

هوَّ يصنع ويَّا أحلى كلام عبور

٠•••••••••••••••••••••••••••••••••

ولمجله عَبَّرِت عن أي جيل

إدَّى فيها كلام وكله عيار تقيل

إسمها (النيل)وكان مالهاش مثيل

إسم غالي عليه كتير زي الندُور

٠•••••••••••••••••••••••••••••••••

عاش وكان كتلة نشاط مليان حماس

صان كرامته حفاظ عليها من المساس

راح مجله إسمها(الإتنين)ياناس

واللي زيُّه بـ اقول عليه صعب العثور

٠•••••••••••••••••••••••••••••••••

أما (روزاليوسف)أم كلام جرئ

دي مجله راح لها بـ قلمُه المُضئ

كان صريح لكن كتير ظنوه مسئ

سابها لكن صبره ماجاش له فُتُور

٠•••••••••••••••••••••••••••••••

راح بـ هِمَّه وبعزيمه وبارتياح

في مجله إسمها كان (الصباح)

عَبَّرِت كلماته فيها عن الكفاح

أصل هوَّ طبعُه حامي وكان يثور

٠••••••••••••••••••••••••••••••••

و-فـ جريدة (المصري) كان بالخير يجود

هوَّ فيها كان بـ يِدِّي بدون حدود

أصله مصري النشأه بس بدون جدود

بس هوَّ في حبها بحر البحور

٠••••••••••••••••••••••••••••••••

بعدها (الأخبار)جريدة كل دار

خَدْ له فيها وقت كان فيه نور نهار

كان كلامه لأي فاسد طلق نار

لو يجامله كان يعيش جوَّه القصور

•••••••••••••••••••••••••••••••••

ولجريدة (الجمهوريه)برضه عاش

بالوضوح بكلام ملان بالإنتعاش

عاش يحارب كل من ضارب طناش

وبصراحه يوجهُه لـ جنّه وحور

٠•••••••••••••••••••••••••••••••••

في ختام الرحله دي مجلة(ياهوه)

فيها التحرير بدونه كان يتوه

كِلمتُه تؤام لـ بسمه على الوجوه

عاش بـ يبني.كان بـ يزرع أرض

بور

٠••••••••••••••••••••••••••••••••

له رصيد ويَّا الطَرَب بـ الأغنيات

برضه أَلِّف للإذاعة مسلسلات

له عدد في فن نظم المقامات

زادوا عن خمسين بـ خمسه ولا

البدور

٠•••••••••••••••••••••••••••••••

نفسي كل الناس ماتعرفهوش سماعي

يقروا له ح يشوفوا مصلح إجتماعي

عاش لـ مصر وحبها مخلص وداعي

ولسلامة أرضها نسر النسور

٠•••••••••••••••••••••••••••••••••

هوَّ مَرَّه حصل لبس لكنه تاب

كان في مضمون الآيات جوَّه الكتاب

ولإله العالمين والكون أناب

أصله عارف ربنا غفَّار شَكور

٠••••••••••••••••••••••••••••••••

هوَّ ده موجز حياة بيرم يجوز

تبقى مَرْجِع للي يطلُب أو يعوز

أما انا بـ ادعي بـ شعري ده أفوز

وابقى أوِّل مَن كَتَب رحلة جسور

………………………………………………

الدكتور/خالد عبدالحميد خربوش

من ديواني المعنون:

من بيرم التونسي إلى الشاعر أبو خربوش

رقم الإيداع في دار الكتب

٢٠٠٧/٩١٨٠

الترقيم الدولي

I.S.B.N 

977-17-4638-3