صبر الڨلوب...بقلمي. هاجر عوني
هذه قصيدة بالعامية التونسية، أرجو ان تنال إعجابكم
صبر الڨلوب
من الصبر ڨلبي مليان
ومن الدمع تِملِتْ غدران
من فراڨها عيني ما تنام
طول الليل مع خيالها سهران
ڨالولي آش بيك هايم
والفكر تايه حيران
ڨلت على جالها نسهر ليالي
نبيع الليل والنوم الغالي
نسهر مع خيالها الزين
و ديما هي في بالي
هاك العيون السود
والخدود لونهم رماني
والحواجب مڨرونين
كيف السيوف تلالي
من الشوڨ ڨلبي ليها
مال و دڨ
حن و رڨ
وشڨ بحور وصحاري
يلوّج على للات البدور
هي حبي وهي راس مالي
يا ڨلبي أصبر وزيد
غدوه يجينا العيد
وللا البية تكون حلالي
بقلمي. هاجر عوني
تعليقات
إرسال تعليق