الكتب انواع ( خاطرة ايقاعية باللغة المحكية) بقلم ..مرقص إقلاديوس
الكتب انواع
( خاطرة ايقاعية باللغة المحكية)
بقلم ..مرقص إقلاديوس
....................
فيه ناس كتبت كتب من ورق.
و ناس كتبت كتب من حجر.
و ناس ماتت من سنين،
و لسة كلمتها مكتوبة على قلوب البشر.
و بيقولوا فيه كتب مكتوبة على الجبين.
يعلم بيها من قدٓر و اقتدر.
.....
و فيه اللي يساعدك عشان تقدر.
و اللي يكسر مقاديفك عشان ما تقدرش.
و اللي يقدٓرك لله في لله كدة.
و اللي مهما اديته ما يقدٓرش.
و فوق الكل كلي القدرة اللي يقدر وحده،
يعطي القدرة للي ما يقدرش.
....
و هنجرب تاني و نروح بعيد ليه.
و نفضل نعيد و نزيد في الحكاوي.
معلمنا سليمان قال زمان.
و كتبوا كلامه فى الأمثال. و كتبوا كلامه غناوي.
افكرك باللي قاله زمان ياللي إنت على الفرح ناوي.
.....
كل اللي بنشوفه اللي قبلنا شافوه.
و لسه الواحد مننا أول ما بيتعلم القسوة.
بيتعلم القسوة في اللي حبوه.
غريبة أوي إن الناس دايما بتنسى.
إن أول قتيل على أرضنا، اللي قتله ..أخوه.
......
و خلاصة الأمر كله أن تتقي الله و تصنع و صاياه.
ليكون لك مكانا عنده عندما تعود إلي سماه.
فمهما طال عمرك، و ارتفعت متمجدا.
فمصيرك يوما أن تلقاه.
ملاح بحور الحكمة..مرفص إقلاديوس
