العمر محطه ....أحمد محمود عوض سعيد الرحامنه -فارسكور-دمياط

العمر محطه
كل منا وله محطه
يحط قطر العمر فيها
مش هتنقص منها خطوه
أو تزيد من خطوه ليها
بعد ماالأرزاق توفي
والأجال يصرخ ناعيها
ترفع الأقلام وتطوي
صفحتك لإدين قاضيها
تنتظر في القبر جنبك
تيجي يوم الحشر بيها
تنفض الأعمال وتنشر
علي الملأ بتطل ليها
يحكم الجبار ويفصل
بالميزان العدل فيها
إن وجد لك خير تعدي
ع الصراط ترمح إليها
جنة الفردوس وتنعم
في سعاده بتشتهيها
وإن حفرت لشرتسقط
نار جهنم تهوي فيها
ليه بنحكم ع الخلايق
واحنا فينا أكتر ما فيها
سيبوا حكم الله وأمره
في عباده رحمه ليها
وانتظر أعمالك أنت
وكل ما افسدته فيها
وكن بحسن الظن راضي
عن عباده واحتويها
قبلها لك سكه واضحه
باختيارك تمشي بيها
تنحسبلك خطوه خطوه
فين تدب وليه ماشيها

المهم بين دروبها
أي درب هتمشي فيه
وأي زاد وياك هتاخده
وأي صاحب هتماشيه
كل شئ قدامك انت
انت شايفه وأدري بيه
إن سعيت للتقوي تربح
وإن جريت ع الغي تيه
إيه مرادك من جهادك
نقي حلمك واسعي ليه
قبل ما يضلك عنادك
وقبل ما يذلك عاديه
يا صديقي العمر لحظه
تقوم وتصحي ماتلاقيه

أحمد محمود عوض سعيد
الرحامنه -فارسكور-دمياط