جحود... من ديوان / سيبنى أحلم للشاعر ( مصطفى فريد
جحود...
من ديوان / سيبنى أحلم
للشاعر ( مصطفى فريد
...............
لأنك حبيبتى وثقت فى كلامك
وصدقت فيكى وداعتك وطيبتك
ورقة مشاعرك خدتنى رمتنى
فى سكة غرامك آمنت وعشقتك
وأول ما شفتك سكنتى فى قلبى
لمحت فى عنيكى ملامح حزينه
سألتك جاوبتى ودمعك بيجرى
وقولتيلى إنك وحيدة غريبة
وإنك فقدتى إيمانك وتهتى
وتاه من طريقك بريق الحقيقة
فردت فى إيديه وخدت بإيديكى
وأقسمت ليكى تكونى الحبيبة
وحلمى وحلمك وحملى وحملك
بكل البرائه فى مشاعرى الرقيقه
شايلهم فى كفى وحالف أوفى
عهودى وادفى حياتنا إللى جايه
ولكن خسارة غفرت الخطايا
وكانت بداية لأسوء نهايه
عملتك سفينتى وبحرت بيكى
فى زورق عنيكى لشطآن مدينتى
لقيتك سفينه ضعيفة فى قلوعها
وكم شراعها فى بحرك غرقتى
ولا قدرت بيكى أواصل لشطى
ولا قدرت أرجع لأول بدايتى
ما كنتش اصدق فى عصفور يزقزق
يكون له مخالب فى غاية البشاعة
أتارى البرائه وروح الصداقه
دى كذبه حقيرة ووهم وإشاعة
باقولها وبصارحك كرهت ملامحك
وباحزن لفرحك ولو حتى ساعة
وباتمنى اشوفك تموتى فى خوفك
وتدبل حروفك فى الخدود
ووردك ريحانه يموت فوق عيدانه
ويطرح مكانه قسوة وشوك
وبحلم فى بكره اشوفك كذكرى
وبتجينى فكرة اخطى الحدود
أدمر مشاعرك واعيش وحدى بعدك
اسطر فى بعدك قصايد جحود
لأنك كفرتى بحبى وغدرتى
وخونتى وبعتى فى لحظة برود
لكنى بصارحك ما حاقدر اسامحك
ولا أنسى جرحك لغاية ما أموت
تعليقات
إرسال تعليق