حنيني اليك..... هناء محمود...ام عبير
حنيني اليك
بحبك اد نار شوقي
لضي عنيك
بحبك اد نار بعدك
ماتكويني
ويكويني حنيني اليك
تاخدني الذكري من نفسي
والاقيني انا نفسي
مابين حضنك وبين حلمي
واشواقي وخوفي عليك
زي النهاردة وزي الساعة دي
كان قلبي فاضي
والحياة ماشية كدة بالتراضي
افرح ف يوم
وابكي ف يوم
ويوم مليان بالغيوم
لحد قلبي مافجأة دق
من بين ضلوعي
هي نظرة من عيونك
توهت جوايا روحي
وقالت لي فوقي
انا الحنان وانا الامان
ياعشق روحي
سلم لك قلبي برضايا
وقلت تتهني في حضني
وتعيش معايا
الاحلام كانت بتاعتي
والحقيقة مستعجبة
من كتر عندي
نسيت الدنيا واساها
نسيت نفسي وياها
قبلك كنت روح تايهة
في ملكوته
لكن الحلم مستكتر
عليا الفرح
وحقيقتي حنت لي
وماليها الجرح
بعدتك الدنيا عن حضني
وقسيتك
قسيتك علي قلبي
ياروح قلبي
وطال البعد بين قلبي
وبين قلبك
لكن روحي ياروح روحي
تروح مني وتندهلك
بتترجاك ترجع لي
ماتبعد تاني
وتغدر بي
انا بين ايديك طفلة
بدور دايماً ع الفرحة
انا بين دروبك ضل
امشي معاك
في كل مكان
من غير مابمل
انا بجري في شرايينك
وحناني يبان في نور عينك
انا وانت روح واحدة
فبلاها كبر ومعاندة
ارجع لي
وارجع تاني طمني
ودفيني
وارحم نار شوقي
وارحم ضعفي وحنيني
هناء محمود...ام عبير
تعليقات
إرسال تعليق