الكلمة من ديوان ولسه بحلم بفجر للشاعر / مصطفى فريد
الكلمة
من ديوان ولسه بحلم بفجر
للشاعر / مصطفى فريد
كل فارس له حصان
والحصان له كبوة واحدة
أما كبوتنا
فهى الكلمه لو طلعت غلط
ماهى أصلها صوت الضمير
ياتكون بها شيطان أثيم
وتكون أسير
وتكون غبى
مابين صفوف الأغبيا
وتعيش فى أوهامك صبى
ياتكون نبى
وتكون أمين
وتكون أمير
مالك زمام الحرف
وبحور الكلام
ماهى كلمتك ليك إلتزام
حرفك لجام
والحكمه جزء من الكلام
ويزيد جمالها
لما تظهر حق ضايع
أوتبايع للأمام
الكلمة كرباج
فوق ضهور الظلم نار
وتبقى للمظلوم أمل
ونور بيتحدى الظلام
الكلمة سيف
فى زمن هزيل
مات واندبح فيه الحمام
الكلمة روح
وعلاج جروح الإنسانية
فى السلام
ولحد ماتروح الآلام
أنا مش هانام
ولحد ماتجينى المنيه
هأفضل أسطر فى الكلام
وأقول حرام
مليون حرام
لما كل الكل يكتب فى الكلام
ويساوى راسه بالعظام
وكلامه زى السوس
بينخر فى العظام
والله حرام
لابد من فرسان شداد
تعيد لنا فن الكلام
وتخطى بينا
فوق حدود المستحيل
من جيل لجيل
تعليقات
إرسال تعليق