حلم الأحلام ...............................د . ملك محمود الأصفر
حلم الأحلام
...............................
عم إحلم أزهار الورد
شوفا حلوة ونوارة
وتتعربش عسوار البيت
ويصير فرجة بالحارة
وتجي لعنا الزينات
متل طيور الطيارة
وأطيب قهوة جنب البيت
وأجمل قعدة يا جارة
.......................
عم إحلم شوف بساتين
فيها العالم عم تسرح
وفيها الصبايا الحلوين
عم تلعب فيها وتمرح
وشوف ولاد بعمر زهور
بالمية عما تسبح
والناس كلن فرحانين
وعشفافن بسمة بتشرح
.......................
سوريا يا وطن الخير
جنة والله حاميها
الجيش السوري كلو نسور
بروحو بدمو بيفديها
وطوائفها بالميدان
إخوة رح بتلاقيها
هلال وصليب متحدين
والكل قلبو بيعطيها
......................
عم إحلم هالناس الراحت
ترجع للوطن وتعود
وتبقى سوريا عمرانة
وإسما عنوان الصمود
وفيها السلم الأهلي محمي
ويزهر عنا الحب ورود
ويرجع عنا الطير الشادي
وترندح أصوات العود
.....................................
د . ملك محمود الأصفر
تعليقات
إرسال تعليق