حـــــــــــوار: هو و هي ..............بقلم المبدعه . عبيــــــر الجنـــــــدي
حـــــــــــوار: هو و هي
..............
هو: من يوم ما بحرت السفينه فى المحيط
والشوق غالبنى .. وكل يوم ..
أبحث بقلبى يا حبيبتى المخلصه عن أى بيت
وارعش دراعى فى الفضا ..
منديل رجوع .. شوفتينى ؟
هى : شفتك كل لحظه تمر ع القلب الحزين
شفتك محبه ودبلتين
شفتك سفاين للحنين
شفتك .. ولكن .. إنت فين ؟
هو : فى معبدك .. باعبد إلهى يا حبيبتى ..
وبادعى ليكى من زمان ..
يحرس طريقك م الغجر
يزرع طريقك بالشجر
يهزم عداكى ويرعى ليكى القلب ..
يا ام النور هرم
هى : شايفاك طريق فوقه القدم
شايفاك بتهزم فى الألم
شايفك ستاير ع البيبان
بتدارى قلبى م الندم
هو : شاورى بمنديلك لعل شراعى
جوه الليل يبان
شاورى لعل الدنيا تصرخ بالسيول
شاورى أنا قد الدخول
هى : حبك هوايا
هو : وانتى حبك كل حاجة ف دنيتى
هى : حبك هوايا
هو : وانتى أول رحلتى
هى : حبك هوايا
هو : آه باحبك يا قمر فوق سكتى
هى خايف علىّ
لأه .. مش ممكن هاخاف ..
واللى فى قلبك أعرفه
هى : إفتحلى بابك
هو : لو فى يوم كان لىّ باب
أنا كنت هافتح ليكى بابى ..
واخبى بابك م الرياح
هى : مشتاق إلىّ
هو زى أى غريب بعيد عن أرضه ..
عن وجه الحبيبه الطيبه
هى : هاتجينى
هو : أيوه .. بالشراع والمركبه
هى : يا حبيبى يا ضوء القمر
إرمى شعاعك ع الدروب
أنا قلبى ليك صفين شجر
يا أغلى قلب من القلوب
هو : جايلك محمل بالشعاع
جايلك محمل بالورق
حُطى الدراع جوه الدراع
ياللا نجيب اللى انسرق
هى : اللى انسرق : قلبى الحبيب
وانت اللى خدته يا قمر
إرجع .. بلاش تفضل غريب
يا قصيده فى ليل السهر
هو : أنا قلبى جاوب ندهتك
هى : إيه اللى طالبه ؟
هو : كلمتك .. راضيه علىّ ؟
هى : ياه ..
بشكل ما جربوش قلبى فى يوم
هو وانا برضه راضى يا قمر
عن ضىّ حارس خطوتى
يا إسم طاهر ع الشجر
إمتى تنور دنيتى
هى : محتاجه ليك واحة حنان
جوه الليالى تضمنى
آجى إليك .. يا نجوم أمان
لو حتى إيه .. ما يهمنى
...... عبيــــــر الجنـــــــدي
تعليقات
إرسال تعليق