جزء من أوبريت / صباح العز يابهية
من ديوان / ضى نهار
للشاعر / مصطفى فريد
صباحك شمس بتنور على جبينك
تفوح منه عطور الفل ويزينك
أمل بكرة إللى جاى مصرور فى منديلك
بيضحك وساكن نوره شرايينك
صباحك نسمة بتداعب عيدان القمح
يهفهف اسمك المليان بنور الصبح
يزيد الصبح صبحية وسنابل فرح
ترقص فى الغيطان ليكى أوان الطرح
صباح مليان ملاغية وحنيه
وكف وليد عليه امه مسمية
صباح رايق ياست الكل يابهيه
رقيتك من حسد عينى
واسم الله يامحمية
صباح الحب يجمعنا فى نن العين
نسيج واحد ما يفرقنا لا لون ولا دين
صباح مكتوب على ضيه بخط مبين
ضيا فجرى بياخد من ضياكى حنين
تعليقات
إرسال تعليق