الفرن الفلاحي ..........بقلم نجلاء عبدالهادي
الفرن الفلاحي
بقلمي
انا هقعد قصاد الفرن
واخبزلي شوية عيش
وكل عجنه هخبزها
هغني معاها موالي
والاقي الغنوه تحلالي
وهتلالي مع القراميش
وهنسج من حروفي توب
يناسب قعدتي الحلوه
علي شوال خيش
وريحة العيش بتغريني
انادي ع اللي بيعدي
واقول دوق خبيز ايدي
فييجي يغني ويايا
ولا يمشيش
وبعد ما تخلص العجنه
نحط الرز بالخلطه
وندمس فولنا في المحمي
ويحلي الاكل ف اللمه
يا واد يا عليش
وعود جعضيض معاه بصله
وحبة مش م الزلعه
وتحرق في العيون دمعه
لكن بشويش
وصوت الضحك بيلعلع
علي العين اللي بتدمع
من البصله اللي بتلسوع
وما بتئذيش
زمان الناس كانت صافيه
ولمتهم كانت دافيه
وباينه الصحه والعافيه
وحقد مفيش
ياريت دامت ولا غابت
وبقيت السنين حلوه
بدون تشويش
بقلم نجلاء عبدالهادي
تعليقات
إرسال تعليق